avatar
puipuiYeung

平時西餐就食得多,不過要搵有質素同有氣氛嘅西餐廳就比較少見!前排工作真好大壓力,放假決定同母親大人是食返餐好既獎勵下自己先得!

位於大角咀嘅LOST STARS LIVEHOUSE BAR & EATERY,逢星期二至日會邀請 Live band 黎演出,等我地一邊品嚐高水準西式佳餚之餘,一邊享受悠閒氣氛

LOST STARS LIVEHOUSE BAR & EATERY裝修精美、環境舒適,仲有個大型投射器比我哋睇演出者嘅資料,而且侍應嘅服務非常良好,仲會為我地介紹精選菜式,當中表演演出會分成三節,每節為20分鐘,係演出期間會暫停落單,每節演出中間有20分鐘休息時間,就會恢復落單,不過大家可以放心,表演進行期間可隨時到餐廳外,不過再次進場就要職員安排喇!我去果晚嘅演出者係 Mukzi,係一隊本地嘅年青組合,佢哋表演嘅歌曲係全部都自己作㗎,曲風比較愉快和輕快嘅感覺,而且主音把聲好動聽,我媽咪聽到真係好陶醉!

食物方面,我地點左半打生蠔,分別係愛爾蘭蠔同美國蠔,好新鮮同大大隻添!首先食左淡身d嘅愛爾蘭蠔,再食濃味嘅美國蠔。
意大利布袋芝士什錦鮮蔬沙律配暖墨西哥餅熟成蛋黃及松子仁,西哥餅好薄好脆口,加啲芝士上面一齊食好美味,菜好新鮮加上醋好開胃添
鐵板炙燒氈酒魷魚,食落爽口,個味道好似香茅香草味,有d辣辣地
我最鍾意食加拿大保濕豬鞍配馬鈴薯泥及蘋果乾蔥甜辣醬,豬鞍啖啖肉,配埋蘋果酸酸地好易入口,乾蔥甜辣醬加埋薯蓉辣辣地,口感層次好豐富
美國USDA prime牛腹肉佐暖墨西哥餅配士拉差蛋黃醬及阿根廷青醬,保留到原有嘅原汁原味 ,唯一係乾身咗小小
飲品方面,藍莓乳酪唔會太甜幾好飲
非常推介朱古⼒熔岩蛋糕配雲尼拿雪糕,會用啲酒淋上蛋糕面上,再點火!蛋糕入口即溶,再加埋入面嘅流心同雲呢拿雪糕,真係好好味啊!我咁怕肥都食咗半個啊,推介!

地址:大角咀利得街11號利奥坊一期地下506號舖
網址:http://bit.ly/3330JWE
節目表: https://www.facebook.com/pg/loststarslivehouse/events/